Archive for Pilipino Mirror

Bakit maraming mahirap sa Filipinas?

TANONG: Bakit ba maraming mahirap sa Filipinas?

SAGOT: Maraming dahilan. Halimbawa’y kulang tayo sa industriya. Malagim ang kasaysayan natin bilang koloniya lamang ng Espanya at Estados Unidos. Kulang ang kalye at bapor. Wala tayong malakihang langis sa ilalim ng lupa. Kung nagkakaroon tayo ng maraming pera ay kinukupit lamang ng ilang masasamang loob na politiko o negosyante. At marami pang iba.

Pero may isang dahilan na kaya nating baguhin.

Ito ang kawalan ng trabaho ng maraming mga kababayan natin.

May mga nawawalan na ng pag-asa na makukuha sila ng matinong trabaho dito sa atin, kaya nangingibang-bansa sila. Mahigit nang sampung milyon daw ang mga kababayan natin na nagtatrabaho ngayon sa ibang bansa. Pero hindi trabaho sa ibang bansa ang lunas sa ating kahirapan.

Ang talagang sagot sa kahirapan ng higit na nakararaming mga kababayan natin ay trabaho dito mismo sa ating bansa.

Ngayon, kung pupuntahan ninyo ang website ng DOLE, makikita ninyo na ang dami palang trabahong naghihintay dito mismo sa ating bansa.

Halimbawa’y Call Center Agent, Service Crew, Salesman/Saleslady, Production Worker o Factory Worker, Technical Support Staff, Cashier, Sales Clerk, Driver, Production Machine Operator, at Customer Service Assistant. (Ayon ang listahang ito sa DOLE.)

Bakit nahihirapan ang mga kompanya na makahanap ng mga empleyadong puwede sa mga posisyon na ito?

Dalawa ang dahilan.

Una’y maraming mga kababayan natin ang nag-aakalang maliit lamang ang suweldo sa mga trabahong ito kaya gusto nila ng ibang trabaho. Pero ayon pa rin sa DOLE, ang isang Production Supervisor o General Foreman ay mas malaki pa ang sahod kaysa sa isang Actuarian na nakaupo lamang sa isang desk sa isang insurance company o bangko.

Sa totoo lang, ayon sa DOLE, halos pareho na ang suweldo ng isang General Foreman na hindi naman kailangang nagtapos sa kolehiyo sa isang System Analyst na kailangang nakatapos ng B.S. Computer Science.

Sa madaling sabi, hindi naman talaga kailangan ang digri mula sa kolehiyo para makakuha ng malaking suweldo. (P36,000 bawat buwan ang karaniwang suweldo ng isang General Foreman.)

Samakatwid ay mali ang akala ng karamihan ng mga kababayan natin na naghahangad ng digri sa kolehiyo na makakukuha sila ng puwestong mas mataas ang suweldo kaysa sa mga nakatapos lamang ng hayskul.

Ikalawa’y mali kasi ang mga itinuturo sa hayskul (o kahit na sa kolehiyo) sa mga estudyante. Hindi handa ang gradweyt (ng hayskul man o kolehiyo) para makuha kaagad ng mga kompanya.

Ito ang tinatawag na “mismatch” o hindi pagiging tugma sa pangangailan ng industriya ang kurikulum ng mga paaralan.

Mabuti na lamang at nagbago na ang kurikulum ng mga paaralan. Ito ay isang bunga ng K to 12 na reporma ng gobyerno. Kasama ang industriya sa pagburo ng kurikulum, kung kaya’t akma na ang itinuturo sa estudyante sa hinahanap ng industriya.

Kapag may trabaho kasi ang isang gradweyt ng hayskul (o kolehiyo), siguradong may maiuuwi na siya sa kanyang pamilya. Magkakaroon ng pera ang pamilya na maaaring ikain nito o, mas mabuti, ipondo sa isang maliit o malaking negosyo. Kapag may hanapbuhay ang isa o higit pang miyembro ng pamilya, siguradong uunlad ang pamilya. Hindi na ito magiging mahirap. (10 Marso 2014)